భారత్‌లో జపనీస్ కార్ బ్రాండ్‌కు ప్రచారకర్తగా హృతిక్ రోషన్

భారత ఆటోమొబైల్ రంగంలో తమ ఉనికిని మరింత సుస్థిరం చేసుకునే దిశగా ప్రముఖ జపనీస్ కార్ల తయారీ సంస్థ 'నిస్సాన్ ఇండియా' కీలక ముందడుగు వేసింది. మిడ్-సైజ్ ఎస్‌యూవీ విభాగంలో 'టెక్టాన్' పేరుతో సరికొత్త వాహనాన్ని గురువారం ఆవిష్కరించింది. ఇదే వేదికపై బాలీవుడ్ అగ్ర కథానాయకుడు హృతిక్ రోషన్‌ను తమ బ్రాండ్ అంబాసిడర్‌గా నియమించినట్లు సంస్థ అధికారికంగా ప్రకటించింది.

హృతిక్ రోషన్ వంటి స్టార్ హీరోను ప్రచారకర్తగా నియమించుకోవడం ద్వారా మార్కెట్‌లో బ్రాండ్ ఉనికిని మరింత పెంచుకోవాలని నిస్సాన్ భావిస్తోంది. ఈ వాహనాన్ని భారత్‌లోనే ఉత్పత్తి చేసి, సుమారు 50 దేశాలకు ఎగుమతి చేయనున్నట్లు సంస్థ వెల్లడించింది.

టెక్టాన్ ఎస్‌యూవీ ప్రారంభ ధరను రూ. 10.49 లక్షలుగా (ఎక్స్-షోరూమ్) నిర్ణయించారు. ఈ వాహనానికి నేటి నుంచే బుకింగ్స్ ప్రారంభం కాగా, జూలై 20 నుంచి వినియోగదారులకు డెలివరీ చేయనున్నారు. గత కొంతకాలంగా భారత మార్కెట్లో తీవ్ర పోటీని ఎదుర్కొంటున్న నిస్సాన్, ఈ కొత్త మోడల్ విజయంతో తిరిగి పూర్వవైభవాన్ని సాధించాలని లక్ష్యంగా పెట్టుకుంది.

టెక్టాన్ ప్రత్యేకతలు

టెక్టాన్ ప్రత్యేకతలు చూస్తే... రెనో డస్టర్ ప్లాట్‌ఫామ్‌పై ఈ వాహనాన్ని నిర్మించినప్పటికీ, నిస్సాన్ పాట్రోల్ ఎస్‌యూవీ నుంచి ప్రేరణ పొందిన వైవిధ్యమైన స్టైలింగ్‌తో దీనిని రూపొందించారు. ఇది 1.0 లీటర్ టర్బో పెట్రోల్, 1.3 లీటర్ టర్బో పెట్రోల్ ఇంజిన్ ఆప్షన్లతో లభించనుంది. పనోరమిక్ సన్‌రూఫ్, వెంటిలేటెడ్ ఫ్రంట్ సీట్లు, డ్యూయల్ జోన్ క్లైమేట్ కంట్రోల్, గూగుల్ బిల్డిట్-ఇన్ సర్వీసులు వంటి అనేక ప్రీమియం ఫీచర్లు ఇందులో ఉన్నాయి.

వాహన భద్రతకు అత్యంత ప్రాధాన్యతనిస్తూ 6 ఎయిర్‌బ్యాగ్‌లు, 360 డిగ్రీ కెమెరా వంటి అధునాతన సదుపాయాలను కల్పించారు. భారత్ ఎన్‌సీఏపీ క్రాష్ టెస్టుల్లో దీని నిర్మాణానికి ఆధారమైన డస్టర్ మోడల్ 5 స్టార్ రేటింగ్ సాధించడం ఇక్కడ విశేషం.